|
Служба Безпечносци України гори од жаданя порушац виновне дїло пре "русинску" гимну Закарпатя 27.01.2010 Служба Безпечносци України можебуц поруша виновне дїло процив депутатох обласней Ради Закарпатя пре то же 22. децембра прилапели гимну Закарпатя на слова Александра Духновича "Руски да жиє народ". По думаня руководства СБУ, ришенє депутато гранїчи ше зоз поволованьом на сепаратизем и загрожованє териториялней цалосци держави. Глава СБУ Валентин Наливайченко доложел же оцену дїйствох депутатох да випитованє котре ше пороби. Кед же будзе нєопходне будзе поднєшена и виновна приява. "Ми тераз робиме зоз тужилаштвом Закарпатскей обласци, баш пре то же плануєме подзвиґнуц тужбу за виновне дїло", сообщел Наливайченко. Цо ше дотика самого ришеня обласней Ради шеф СБУ Наливайченко виявел же воно "нє ступело на моц, бо процес гласаня бул потупени и нєма нїяке дїйство". Наливайченко тиж гварел же поволованє на сепаратизем и загрожованє цалосци держави – виновнє дїло котре нєма рок застарйованя. "Самим тим анї єден депутат нєма право виступац зоз сепаратистичнима поволанками". 22. децембра обласни совит Закарпатя утвердзел официйну гимну обласци- гимну подкарпатских русинох "Руски да жиє народ". Ришенє потримало 46 од 90 депутатох. Закарпатску обласц населюю жителє од коло 100 националносцох, медзи котрима и подкарпатски Рисини, котрих по попису жительства 2001. року єст дацо вецей од 10000. Сами Русини после того попису виявели же резултати були фалсификовани. Служба Безпечносци України робела информативни розгварки зоз активистами русинского руха котри себе чувствую як коренни народ Закарпатя и закладаю ше за окремни статус обласци. Процив найрадикалнєйших уш подвигнуте виновне дїло и почало судзенє духовному лидерови русинох протоєрейови Димитрийови Судорови.
|